Toponímia - El Bricial

El Bricial

Bricial, El: Mayada asitiada nuna vega afondigonada con campera na llanada del sur del Llagu Ercina. Ye una duerna glaciar que s’alcuentra a mas de mil metros de altitú y que s’enllaguna col mal tiempu, colo que les agues soterrañes que surden penriba y que nun son embebies pol sumidoriu que-y val de desafuegu, axúntense a la llena. Por razón d’ello conózse pol “tercer llagu”. 

El llugar ta arrodiáu de caliar, nun siendo pela fastera onde s’alluguen les cabañes de pastores, que nun ye tan pindia. La fastera norte fina n’El Picu Bricial, un llambrial emprunu con lladeres de xerru. Per esti mesmu sen, fórmase una rieguina coles agues que desafuega El Llagu Ercina. Pel este y tamién col mal tiempo, el calce d’ El Ríu Resecu depéñase derrocando a chorru per La Mexona, ensugando’l remexón  coles seques.